29 November, 2007

Hijj

الحمد الله علي نعمه الاسلام و توفيق الايمان و كفي بهما نعمه
قعدت افكر كتير ازاي اكتب البوست ده. ملقتش كلام ممكن يوصف الجوايا و اعبر اد ايه اني حاسس بفضل ربنا عليا. الحمد الله ربنا كرمني و اسمي طلع مع حجاج القرعه و انشاء الله حسافر لمده شهر للحج.

زمان كنت بقول لنفسي ان الحج اولي من العمره و الاحسن اني احج مره واحده الفكره دي اتغيرت مره و انا بصلي التراويح مره في رمضان. وانا قايم من الركوع مره واحده حسيت اني في الحرم المكي و راسي بتحك في ستاير الكعبه. قلبي وجعني اوي و حسيت بشوق غريب. الحمدالله نفس السنه روحت عمره و ربنا كرمني اخر كرم من الفلوس و الصحبه و التيسيرو هناك دعيت ربنا يرجعني تاني في عمره الدعاء كان عند الملتزم بين باب الكعبه و الحجر الاسود

الحمد الله رجعت تاني. بعديها ب 3 سنين. حمدت ربنا و انا ساجد في المسجد النبوي في الروضه و في رمضان بعد صلاه التراويح علي النعمه و استجابت الدعاء. و دعيت تاني ربنا انه يعدني في عمره بس بعدين استصغرت نفسي اوي اني في المكان ده و دعيت بعمره فدعيت بحجه قريب حسيت اني بطلب المستحيل بس اذا مكنتش حطلب المستحيل في المكان ده حطلبه فين و من مين لغير من ربنا في مسجد رسوله

طول السنه و انا بفكر في الحج و اطلب الاذن من ربنا انه يسمحلي و يعني عليه. قعدت افكر واحسبها و اد ايه حتئسر علي فلوس انا شيلها لجواز و شقه و كمان ازاي انا طلبت تقدير سنوي بسيط في الشغل عشان متشتغلش نفسي و اد ايه ده حيفرق معايا في توزيع الارباح.

كنت فاكر ان حج القرعه ده للناس الكبيره و الوسايط مش واحد عادي يعني يدخل و يقدم و يتقبل. بس قدمت ليا و لاختي و في نفس الوقت دورت في شركات السياحه الاسعار كانت بتتكلم في الاربيعينات بس الحمدالله طول عمري متاكد ان الفلوس الي بتتدفع ل الله مبتروحش و ترجع بزياده.

و في يوم مش ولابد في الشغل ماما اتصلت بيا في الشغل و بلغتني ان القسم اتصل و بلغها ان انا و اختي اتقبلنا في القرعه. رحت علي القسم و فعلنا لقيت اسمي و اسم اختي موجود. و مشيت في الاجراءات و كله كان ميسر و بتكاليف تقريبا تلت الي كنت حدفعه في اي شركه سياحه و كمان ربنا رزقني بصحبه صالحه معايا علي نفس الرحله.
حاسس بكرم رهيب من ربنا و حاسس بخوف رهيب اني مستهلش الكرم ده. عمري ماخوفت علي نفسي ولا صحتي بس خايف يحصلي حاجه قبل احرام الحج و خايف منلش وقفه عرفه و خايف فلوسي تكون حرام و اول ما ابتدي تلبيه الملايكه ترد لا لبيك خايف من ذنوب كتير عملتها و ذنوب اكتر عملتها و نسيها و خايف ان ربنا مخليني سبب لطلوع اختي مش عشان

حسيس بكرم ربنا و حاسس اني مستهلوش. وانا بشوف اسماء زمايلي في القسم لقيت ناس جيه و مبتلقيش اسمها قلي بقالو 3 سنين بيقدم ولي كبير في السن و نفسه يحج قبل مايموت و بنات نفسها تحج و مش لاقيا محرم معاها شوق من ناس كتير تروح.

غالبنا ده حيكون اخر بوست عشان انشاء الله حسافر يوم السبت. الي طالبه دعاكم ان ربنا يعني و يتقبل و انشاء الله حدعي لناس كتير من البلوج عمر مشفتوهم و يمكن عمر ماعلقت عندهم كمان.
و السلام ختام

تلبيات الحرام بترن في وداني و نفسي اقولها بصوت عالي.

5 comments:

Me said...

I can't stop my tears...
Rabena m3ak ya Askandarani... Rabena yattaqabbal minnak insha Allah...
You deserve the best...

MAKSOFA said...

والله قلبي انشرح لما قريت البوست الف مبروك وربنا يتقبل منك أنت وأختك بأذن الله
==============
كله مكتوب والحمد لله ربنا حقق لك ماتريده
ترجع بالف سلامه

Pink Unicorn said...

ماشاء الله
والله انا فرحت لك بجد
الفرحة والشوق لبيت الله الحرام بترقص فى كل كلمة من كلامك
ربنا يتقبل منك و من اختك ومن كل واحد او واحدة راح الحج وفى قلبه اخلاص و شوق لربنا
انا عارفة انك غالباً مش حتلحق تقرا الكلام ده قبل ما تسافر بس انا عايزة اقوللك ماتخافش .... مدام كل الأيمان ده فى قلبك اكيد ده كان السبب فى ان ربنا ادى لك الفرصة العظيمة دى و ان شاء الله يتقبل منك و يغفر لك و لناولكل امة محمد انه غفور رحيم

Egyptiana Trapped Soul said...

طلبتها بنيه صافيه وقلب مفتوح، وربنا نولهالك

تستحقها يا اسكندرانى عشان انت انسان نقى وكويس ولو ماكانش بينك وبين ربنا عمار مكانتش جت

ربنا يعينك ويقويك ويتقبل ان شاء الله
ترجع لنا بالسلامه... وادعيلنا ربنا يزيح عننا الكرب والهم والحزن
اللهم امين

Anonymous said...

ربنا يتقبل و يكتبها لنا جميعا إن شاء الله